La kuba urbo Trinidad, situanta en la centro-suda provinco Sancti Spiritus kaj fondita la 2an de februaro 1514 de la hispana konkeranto Diego Velázquez de Cuéllar, oficiale ricevis la statuson de monda metiarta urbo la 15an de septembro 2018.

En Latin-Ameriko nun troviĝas kvin urboj posedantaj la saman distingon. En ceteraj mondpartoj kiel Ĉinio, Barato, Irano kaj Danio, urboj premiitaj elmontras ankaŭ tiun prestiĝan ateston, ĝi iĝas vera ĉarmo por homoj dezirantaj ilin viziti, kaj tiel ĝui iliajn metiartojn, kiel esprimojn de ilia aŭtenteco.

„Kiel stimulon al la kreado, tradicio kaj agnosko de la metiistoj el Trinidad”, karakterizis Mercy Correa, vic-prezidanto de Monda Konsilio pri Metiartoj (MKM) (angle World Crafts Council - WCC) por Latin-Ameriko, la menciitan distingon okaze de ties transdono al la urbo. MKM estas ne-registara organizaĵo senprofitcela fondita en 1964, en Nov-Jorko, destinata al reakiro kaj konservado de tiaj artmetioj.

Trinidad estas urbo de tradicioj kaj legendoj. Viglas tie la metiarta kreado, kiun oni naturforme transdonas de generacio en generacion. Jen evidentaj ekzemploj el ili: tolaĵo, ceramiko, palmaĵoj, teksaĵoj, plastikarto kombinita kun metiartoj, trikarto kaj brodaĵoj.

Antaŭ ĉi tiu momento speciala, oni profunde enketis pri tiu ĉi temo, kaj en 2015 oni ellaboris dosieron, kiun oni prezentis al la menciita organizaĵo, kaj la urbon vizitis fakuloj de MKM. En 1988 Trinidad estis ankaŭ deklarita de Unesko Kultura Heredaĵo de la Homaro.

Juan Carlos MONTERO MEDINA

korespondanto de MONATO en Kubo

Tiu ĉi teksto aperis en la presita kaj en la PDF-forma versioj de Monato en la jarkolekto 2019, numero 10, p. 20.

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Juan Carlos Montero Medina el MONATO (www.monato.be).

Lasta adapto de tiu ĉi paĝo: 2020-07-07