Moderna vivo
HAVANA RADIO
Voĉo de la kuba heredaĵo
La titolo identigas la kuban radiostacion situantan en la urbocentro de la ĉefurbo. La tre konata tiel nomata Plaza de las Palomas (Placo de la kolomboj) brakumas la belan konstruaĵon, kie troviĝas Havana Radio, en La Lonja del Comercio (La kunsidejo de komerco).
La radiostacio, kiu apartenas al la Oficejo de la Urba Historiisto, estis fondita la 28an de januaro 1999, kiel omaĝo al nia nacia heroo José Martí en lia naskiĝdatreveno. Ĉi-jare, kiam Havano festas sian 500-jariĝon, la „voĉo de la kuba heredaĵo” kunfestas sian 20an datrevenon.
Urbocentra radiostacio
Kial havi radiostacion en la urbocentro? Temas pri ideo de la urba historiisto Eusebio Leal Spengler, tre klera kaj ĉarma homo, kiu impulsas kaj transformas la projekton pri konservado de la kuba heredaĵo.
La programeroj de Havana Radio havas kulturklerigan enhavon kaj estas plejparte gvidataj de fakuloj pri muzeologio, historio kaj kulturo. Oni celas diskonigi la agadon de la Oficejo de la Urba Historiisto ne nur en Havano, sed ankaŭ tra la tuta insulo.
La radiostacio subtenas la ideon pri muzeo de radio en Kubo kun la celo konservi la historian memoron de tiu ĉi amaskomunikilo, kiu havas solidan tradicion en la kuba popolo.
Laŭ diro de la kuba intelektulo Eusebio Leal Spengler, „Havana Radio volis esti eta fajrero dum tiuj ĉi jaroj. Por gvidi la radioteamon oni alvokis la tiaman knabinon Magda Resik, kiu nuntempe estas ĵurnalistino kaj doktorino kaj entreprenis la projekton kun respondeco kaj seriozeco. Ŝi kreskigis ĝin kaj profesie mem kreskis”.
| Tiu ĉi teksto aperis en la presita kaj en la PDF-forma versioj de Monato en la jarkolekto 2019, numero 03, p. 12. |
|
Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton:
Artikolo de Ariadna García Gutiérrez el MONATO (www.monato.be). Lasta adapto de tiu ĉi paĝo: 2020-07-07 |