En MONATO 2019/02 mi raportis pri la stafeta diservo en Hago. Fakte, ĝi komenciĝis la 26an de oktobro. Mi mistajpis. Indas krome mencii, ke ankaŭ mi kune kun kolego-teologo el nia haga remonstranta komunumo 4-foje povis diservi tie. Unu fojon mi eĉ celebris tie la Sinjormanĝon, alivorte la eŭkaristion, entute inter la amasa celebrado, kvankam pro mia pasintjara infarkto mi timis neniam plu povi tion fari. Plej speciale menciindas, ke foje eĉ duopo da menonitaj pastoroj el Usono peraviadile venis por gvidi du sinsekvajn diservojn.

Post decido de la registaro doni azilon al la koncerna familio plus al kvarcent ĝis kvincent aliaj koncernatoj, kiuj jam dum pluraj jaroj atendas respondon pri sia peto je azilo, la stafeta diservado finiĝis la 30an de januaro. Mirinde ĝuste tiumomente komenciĝis la operacio de mia koro!

Gerrit BERVELING

Nederlando

Tiu ĉi teksto aperis en la presita kaj en la PDF-forma versioj de Monato en la jarkolekto 2019, numero 03, p. 5.

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Gerrit Berveling el MONATO (www.monato.be).

Lasta adapto de tiu ĉi paĝo: 2020-07-07