La ponto Mesi estas ŝtona arkoponto super la rivero Kir en nord-okcidenta Albanio. Ĝi troviĝas 8 km for de la urbo Shkodër [ŝkoder]. La ponto estas turisma allogaĵo ne nur por lokaj loĝantoj, sed ankaŭ por eksterlandanoj. Okaze de nuptofestoj ĉi tien venas geedzaj paroj por fotiĝi. Ili kredas, ke ili estos benataj, se ili trapasos tiun malnovan ponton. Ĉiujare ĝin vizitas miloj da turistoj el i.a. Britio, Ĉeĥio, Germanio, Pollando kaj Rusio.

La ponto estis konstruita en la jaro 1768 laŭ ordono de la paŝao Mehmet Buŝati, unu el la regantoj en Nord-Albanio. Ĝi estas 108 m longa, 3,4 m larĝa kaj havas 13 arkojn, el kiuj la meza estas 21,5 m longa. Por la konstruado de la ponto oni uzis tajlitajn ŝtonojn kaj ŝtonplatojn.

En majo 2010 la albana ŝtato rekonstruigis la ponton kaj adaptis ĝin al piedirantoj.

Bardhyl SELIMI

korespondanto de MONATO en Albanio

Tiu ĉi teksto aperis en la presita kaj en la PDF-forma versioj de Monato en la jarkolekto 2019, numero 07, p. 20.

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el MONATO (www.monato.be).

Lasta adapto de tiu ĉi paĝo: 2020-07-07