Orienta Partnereco estis fondita en 2009 kiel diplomatia projekto de Eŭropa Unio (EU) post iniciato de Pollando. Ĝi prezentas platformon, kiu subtenas eŭropan integradon kaj celas plivastigi la rilatojn kun la ses eks-sovetiaj respublikoj Armenio, Azerbajĝano, Belorusio, Kartvelio, Moldavio kaj Ukrainio.

Pri la estonteco de Orienta Partnereco, sed ankaŭ pri interhomaj rilatoj, regiona sekureco kaj ekonomia kunlaborado parolis la ministroj pri eksterlandaj aferoj de la Viŝegrada Grupo (Ĉeĥio, Hungario, Pollando kaj Slovakio) maje en Bratislavo, Slovakio.

Laŭ la slovaka ministro pri eksterlandaj aferoj, Miroslav Lajčák, lia lando delonge konsideras Orientan Partnerecon sukcesa politiko de EU kaj havas grandan intereson, por ke ĝi estu plue inter la prioritatoj de EU. En solena proklamo subskribita de la partoprenantoj oni esprimis subtenon al la landoj de Orienta Partnereco.

Partoprenis la kunsidon ankaŭ la ĉefo de la rumana diplomatio, ministro Teodor Viorel Melescanu (ĉar Rumanio dum la unua duono de 2019 prezidis la Konsilion de Eŭropa Unio), la eŭropa komisionano pri najbareca politiko kaj EU-plivastigo, Johannes Hahn, kaj la ĝenerala sekretariino de la Eŭropa Servo por Ekstera Agado, Helga Schmid.

Julius HAUSER

korespondanto de MONATO en Slovakio

Tiu ĉi teksto aperis en la presita kaj en la PDF-forma versioj de Monato en la jarkolekto 2019, numero 07, p. 5.

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Julius Hauser el MONATO (www.monato.be).

Lasta adapto de tiu ĉi paĝo: 2020-07-07