Internacia grupo de sciencistoj malkovris novan specion de natriko, kiu vivas en Turkio, Azerbajĝano, Armenio, Kartvelio, Irako, Irano kaj Rusio, krom en malgranda areo de orienta Eŭropo. Surbaze de genetikaj kaj morfologiaj donitaĵoj la sciencistoj konstatis, ke de la natriko science nomata Elaphe sauromates ekzistas du malsamaj specioj. La nova, disa specio de natriko estas nomita Elaphe urartica kaj science priskribita en la ĉi-maja eldono de la internacia scienca gazeto PeerJ.

Antikva reĝolando

La novan sciencan nomon proponis la sciencistoj honore al la germana zoologo kaj botanikisto Peter Simon Pallas (1741-1811), kiu proponis siatempe la nomon Elaphe sauromates. La specifa epiteto de la nova scienca nomo (urartica) devenas de la nomo de malnova reĝolando de la ferepoko, konata kiel Urarto, kiu situis en montara regiono inter la sud-oriento de la Nigra Maro kaj la sud-okcidento de Kaspio. La reĝolando akiris potencon en la dua duono de la 9a jarcento a.K. kaj estis konkerita de medoj komence de la 6a jarcento a.K.

Detala analizo

Laŭ zoologoj estas eksterordinare komplekse trovi ĉi tiun specion de natriko en libera naturo. Ili kolektas bazajn genetikajn informojn jam de 17 jaroj, kaj nur detala analizo de DNA (deoksiribonuklea acido) klare montris, ke temas pri frata kaj tiel nomata kripta, t.e. kaŝita specio de natriko. La suma longo de la nova specio estas kutime 1,2 metroj. Ĝi ne estas venena kaj tute sendanĝeras.

La serpentoj de la genro Elaphe estas tre popularaj inter la bredistoj de serpentoj. Ili vivas ne nur en la mezvarma zono, sed ankaŭ en subtropikaj kaj tropikaj regionoj.

Julius HAUSER

Tiu ĉi teksto aperis en la presita kaj en la PDF-forma versioj de Monato en la jarkolekto 2019, numero 11, p. 16.

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Julius Hauser el MONATO (www.monato.be).

Lasta adapto de tiu ĉi paĝo: 2020-07-07