Scienco

KUBO

Plej efika rimedo kontraŭ ronĝuloj

Kubo havas la kapablon fabriki kreskantan aron da bioproduktaĵoj por agrikulturaj celoj. Ĉi tiun pliiĝon pruvas la ĉeesto sur la merkato de 25 malsamaj tipoj de elstaraj produktoj ellaboritaj en la lando. Laboratorios Biológicos Farmaceúticos S.A. (Labiofam) (Biologiaj Farmaciaj Laboratorioj S.A.) estas kuba firmao, kiu okupas sin interalie pri veterinaraj kuraciloj, vakcinoj virusaj kaj bakteriaj kaj dietaj suplementoj. Ĝi fabrikas ankaŭ la biologian produkton Biorat, kiu pro sia efikeco disvastiĝas pli kaj pli al aliaj landoj.

„Biorat estas uzebla por elimini ronĝulojn, nome ratojn kaj musojn, kaj iliajn plagojn” sciigis Andrés Molina Soto, ĝenerala direktoro de Labiofam. Ĝi estas produktata en la centro-sudo de Kubo ekde 1994, kaj grandan kvanton da ĝi akiras institucioj pri publika sano por malpliigi kaj forigi „nedeziratajn gastojn”. Biorat estas ellaborita surbaze de rizo kun ŝelo, kiun oni fermentigas. Ĝi uzas kiel aktivan substancon la bakterion salmonelo (Salmonella enteritidis) kaj pli precize ĝian varianton Danysz, pli taŭgan por ratoj kaj musoj. Ĝi estas ne-noca por aliaj specioj kaj estas ankaŭ biomalkomponebla.

Sunradioj

Inter la avantaĝoj oni povas mencii, ke ĝi mortigas ratojn kaj musojn per unufoja apliko; ke ĝi ne damaĝas homojn kaj hejmajn bestojn; ke ĝi facile utiligeblas kaj aplikeblas; ke malsanaj ronĝuloj infektas kaj mortigas la sanajn; ke unufoja apliko sufiĉas por malaperigi ronĝulojn dum 6-8-monata periodo; en lokoj, kie estas ankaŭ aliaj manĝaĵoj, Biorat estas preferata de ratoj kaj musoj. Oni devas apliki la produkton, kiam plej granda estas la agado de ronĝuloj (post la 4a posttagmeze).

Eksporta plano

Labiofam eksportas la produkton Biorat al pluraj landoj, kiel Alĝerio, Salvadoro, Nikaragvo, Meksiko, Gvatemalo, Dominika Respubliko, Haitio, Peruo kaj Ekvadoro. La eksporta plano por ĉiu jaro celas atingi 67,5 tunojn.