La 19an de aŭgusto 2019 la 26-jara junulo Ángel Ernesto López Hernández starigis mondrekordon, kiam li „blinde” pedalis per unurada ciklo tri kilometrojn en 13 minutoj kaj 35 sekundoj. Tion li faris tra ĉefaj stratoj de la urbo Sancti Spíritus.

„Kiam mi ekkonis Aliet Pérez Martínez, kiu rompis – la 13an de aŭgusto 2016 en Santiago de Cuba – la mondan rekordon de blind-stirado de motorciklo sen kromĉaro, mi sentis min inspirita de lia heroaĵo”, diris Ángel Ernesto. „Malkovrinte tiun ĉi veturilon kun nur unu rado, mi intencis rompi la rekordon kaj, ĉar mi estas tre obstina, tion mi atingis.”

Por garantii, ke lia vidpovo fariĝas nula, sur la okuloj li portis unue bandaĝon el kotono kaj gazo; sur tio li portis krome maskon kaj fine nigran kapuĉon.

La heroo

Ángel Ernesto laboras en la municipa grupo pri scenaj artoj, kiel klaŭno Galletica (kekseto) kaj kiel amatora ekvilibristo sur sep benketoj. Antaŭ pli ol unu jaro li planis tiun heroaĵon antaŭe neniam konatan en la mondo.

La junulo esperas sukcesi registri la eventon en la libro Guinness de mondaj rekordoj.

Juan Carlos MONTERO MEDINA

korespondanto de MONATO en Kubo

Tiu ĉi teksto aperis en la presita kaj en la PDF-forma versioj de Monato en la jarkolekto 2019, numero 12, p. 8.

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Juan Carlos Montero Medina el MONATO (www.monato.be).

Lasta adapto de tiu ĉi paĝo: 2020-07-07