Moderna vivo

SOCIO

Ĉu Nobel-premio meritita?

Ĉi-jare la Sveda Akademio aljuĝis Nobel-premion pri literaturo ankaŭ al la aŭstro Peter Handke ¹. Sen pridiskuti la artistajn valorojn de la premiito albanoj estas tre ŝokitaj kaj ĉagrenitaj, ĉar temas pri homo kun ideoj kaj agoj ekstreme faŝismaj, esprimitaj kaj elmontritaj ankaŭ okaze de la lastaj militoj en la eksa Jugoslavio, ĉefe en Kosovo.

Peter Handke subtenis la pereigajn klopodojn de la reĝimo de la „buĉisto de Balkanio”, Miloŝeviĉo, kontraŭstaris la NATO-bombardadojn al militistaj ejoj de Serbio, kaj ĉeestis la entombigajn solenaĵojn de la lasta serba diktatoro komunista, ege admirata de li mem.

Seniluziiĝo kaj plendoj

Albanoj ĝenerale – kaj aparte tiuj de Kosovo – sentas sin humiligitaj kaj seniluziigitaj pro tia decido de la Akademio, kiu tradicie elstarigas la plej progresemajn personojn de nia homaro. Per sia prezidanto Mehmet Kraja la Akademio de Sciencoj de Kosovo sendis oficialan proteston, dum la albana ĉefministro Edi Rama diris, ke „mi unuafoje vomemis pro tia decido de la sveda akademio”.

Neregistaraj organizaĵoj alvokis pri peticio kun centmiloj da subskriboj, sendota al Svedio por postuli la nuligon de la premio aljuĝita al Peter Handke.

1. Aŭstra verkisto, aŭtoro de teatraĵoj, noveloj, poemoj kaj eseoj.