Tamen pli kaj pli en Japanio ŝrumpas la natura mondo. Arbaroj malaperas, kaj ne plu alflugas goliatoj al stratlampoj. Antaŭ kelkaj jaroj oni ekvendis goliatojn en magazenoj; nun, tamen, eblas ilin aŭtomate akiri. En la urbo Oogaki, gubernio Gihu, estas instalitaj tri aŭtomatoj, kiuj donas goliato-paron en plasta kesto kontraŭ 400 enoj (ĉ. 3,5 eŭroj).
Laŭ la aŭtomato-fabrikisto, neniu ĝis nun plendis pri la sanstato de la goliatoj. Li aldonis: “Homoj atendas por aĉeti, kiam mi enmetas ilin.” La aŭtomatoj estas aparte bonvenaj al patroj, kiuj, irante hejmen malfrue, volas aĉeti donacon por siaj gefiloj.