Kvar jarojn post la murdo de aŭstralia misiisto kaj liaj du filoj, barata kortumo kondamnis al morto unu fundamentisman hinduon kaj al dumviva malliberiĝo 12 aliajn.
Jam de 1965 Graham Stuart Staines [stejnz] el Aŭstralio laboris en Barato inter lepruloj. En januaro 1999 Staines kaj liaj du filoj, 11- kaj 7-jaraj, dormis en sia veturilo en vilaĝo en la orienta subŝtato Orissa [orisa]. Viraro krianta kontraŭ-kristanismajn sloganojn ĉirkaŭis la veturilon. Tiam, laŭ vidintoj, la grupestro Dara Singh [sing] verŝis kerosenon sur la veturilon kaj ĝin ekbruligis.
La murdo, unu el la plej hororaj inter multaj kontraŭ-kristanaj atakoj, estis vaste raportata kaj tutmonde kondamnata. La barata registaro, koalicio estrata de la dekstra-hindua Barata Popola Partio (BJP), estis premata puni la kulpulojn, aparte pro tio, ke Dara Singh estis ano de la junulara sekcio de unu el la hindu-fundamentismaj partioj, kiuj subtenis BJP-on.
Tamen, malgraŭ atesto de vidintoj, la subŝtata polico ne procesis kontraŭ Dara Singh. Male, oni eĉ parolis pri politika kariero por li. Tamen, en 2001, ŝtatregistara instanco rekomencis proceson kontraŭ la akuzitoj. Finfine aparta kortumo en septembro 2003 ilin kondamnis.
La vidvino de Staines, kiu restas en Barato por daŭrigi lian laboron, diris pri la proceso: „Mi jam pardonis la murdintojn. Pardono resanigas, kaj nia lando bezonas resaniĝon de malamo kaj perforto.”
La kortuma decido donas esperon al tiuj, kiuj serĉas justecon por la 2000 homoj (plejparte islamanoj) pereintaj dum la tumultegoj en 2002 en la subŝtato Gujarat [guĝarat]. La perforto kontraŭ la islamanoj okazis kredeble kun la apogo de la registaro (vidu MONATOn 2002/6).
| Indekso |
| Aboni al MONATO |
| Flandra Esperanto-Ligo (FEL) |
| Lasta adapto de tiu ĉi paĝo: junio 2019 |