Germanoj eble baldaŭ havos manieron por limigi aŭskultadon de muziko de Robbie Williams: la registaro en Berlino pripensas enkonduki kvoton por germana pop-muziko kaj tiamaniere malfortigi la hegemonion de anglalingva muziko en radio. Politikistoj kaj pop-artistoj plendas, ke la procentaĵo de germana pop-muziko ŝrumpis al 10 en la nacia radio. Peter Maffay, germana pop-veterano, diris en intervjuo: „Multaj elsendejoj rifuzas ludi mian muzikon kaj tiun de miaj germanaj kolegoj. Tio estas cenzuro. Germanaj artistoj kaj aŭskultantoj estas manipulataj per la dominado de la angla lingvo.”
Sekvindan ekzemplon montras Francio: tie radiostacioj estas devigataj plenigi 40 % de sia tempo per franclingva pop-muziko. En Hispanio kaj Italio okazas preskaŭ same. Muzikelsendejo Radio Fritz opinias, ke „ne ĝustas, ke ni ne volas ludi germanan muzikon. Simple ekzistas tro malmulte proponebla al nia aŭskultantaro.” Berlina gazeto BZ ĝustigas: „Germanaj artistoj ne ricevas elsendotempon ĉar ili estas enuigaj kaj neelteneble ideologiaj.”
„Oni ofte diras, ke ĉiu, kiu faras bonan muzikon, eniros radion, sed tio ne estas la vero”, diras la estro de unu germana muzika eksportagentejo. Micha Rhein de la germana grupo In Extremo aldonas: „Nia kanto estis en la tria loko de la ranglistoj dum semajnoj, sed ni havis grandajn malfacilaĵojn ludigi ĝin en radio – tio estas vangofrapo.”
La muzikindustrio kredas, ke bandoj ne povas esperi pri eksterlanda sukceso sen sufiĉa subteno hejme, kvankam malklaras, kiom grandan kreskoŝancon havas germanlingva pop-muziko en la monda merkato. Germanio estas unu el la kvin plej grandaj muzikmerkatoj de la mondo, sed troviĝas ekde 1997 en profunda krizo. La vendado falis ekde tiam je 40 %.
| Indekso |
| Aboni al MONATO |
| Flandra Esperanto-Ligo (FEL) |
| Lasta adapto de tiu ĉi paĝo: novembro 2004 |