En aprilo la polico arestis 22-jaran viron en la orient-flandra municipo Sint-Gillis-Waas, dum li sidis en sia aŭto kaj interretumis, uzante la neprotektitan reton de apuda domo. Najbaroj estis plurfoje rimarkintaj la saman scenon kaj pro tio avertis la policon. Post notado de liaj deklaroj la policistoj liberigis la viron kaj plusendis la dokumentojn al la esplorjuĝisto. En oktobro la retumanto venis antaŭ la tribunalon. La juĝisto deklaris lin kulpa pri regula enpenetrado en komputilan sistemon de alia persono sen ties permeso kaj punis lin per unujara enkarcerigo. La leĝo, kiu malpermesas tian uzon de Interreto, jam de multaj jaroj ekzistas, sed unuafoje okazis verdikto kun la maksimume ebla puno.

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de pp el MONATO (www.monato.be).

Lasta adapto de tiu ĉi paĝo: 2019-04-17