En la jaro 2008 aperis en Zagrebo libro de Ivan Špoljarec Pupoj vive, lige kun la 40-jara jubileo de la Pupteatra Internacia Festivalo (PIF). Ĉiuj tekstoj aperas en la kroata, angla kaj esperanta kaj estas verkitaj de pluraj aŭtoroj.

Mallongan historion pri la ekesto de PIF sekvas multaj fotoj de unuopaj pupoj, scenoj, pupludantoj. La diraĵo, ke bildoj diras multe pli ol vortoj, des pli validas, se temas pri historio pupteatra.

Estus interese, scii la enhavojn de teatraĵoj, kiaj „Kiam panjo ne estas hejme”, „Birdoj” aŭ „Blua, blanka kaj nigra”. Aliaj havas konatajn temojn, ekzemple, „Princino sur la pizgrajno”.

La ĉapitroj „De jaro al jaro”, „Ekspozicio post ekspozicio” kaj „Premio post premio” mallonge priskribas ĉiun festivalon, ekspoziciojn kaj premiitojn; flanke de la tekstoj estas fotoj de organizantoj, teatraĵoj, publiko, ludantoj.

„Repertuaro” indikas, kiuj pupteatroj partoprenis en tiuj kvardek jaroj kaj kion ili ludis; sekvas „Flaviĝintaj paĝoj” kun tondaĵoj el ĵurnaloj kaj revuoj.

La tuto estas ne nur interesa sed ankaŭ bela libro, kiun ne nur infanoj ŝatos trafoliumi. Inda memoraĵo de tradicio, kiun iniciatis kaj daŭrigis entuziasma grupeto, kiu tra la jaroj aldonis novajn erojn.

Enestas kelkaj kompost-eraroj en la unuaj paĝoj, sed tio ne ĝenas la komprenon.

Anneke BUYS

Ivan Špoljarec: Pupoj vive. Trilingva eldono (kroata, angla, Esperanto). Eldonis IKS, Zagreb, 2008. 237 paĝoj binditaj. ISBN 978-953-6697-22-9.

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Anneke Buys el MONATO (www.monato.be).

Lasta adapto de tiu ĉi paĝo: 2020-07-07