Komputado
INTERRETO
Pli da diskriminacio en Interreto
Pasintjare aperis pli da diskriminaciaj kaj rasismaj leteroj en ĉenaj retmesaĝoj, en interkonaj retejoj kiel Facebook kaj Netlog, en diskutgrupoj, en blogoj kaj en la filmretejo YouTube. Tio montriĝas el jarraporto de la Centro por Egalaj Ŝancoj kaj por Batalo kontraŭ Rasismo en Belgio.
Plendoj, kiujn la centro ricevis, temis ne nur pri rasismo, sed ankaŭ ofte pri malamo kontraŭ samseksemuloj.
En 2008 alvenis 430 mencioj pri instigo al malamo. Tio kvarone superis la nombron de la antaŭa jaro. Triono de la plendoj temis pri ĉenaj retmesaĝoj kaj pri koleraj mesaĝoj inter individuoj. La centro substrekas, ke temas pri belga fenomeno, ĉar en tiu lando cirkulas pli da rasismaj kaj ksenofobaj ĉenmesaĝoj ol proporcie en aliaj eŭropaj landoj.
La aŭtoroj de tiaj leteroj penas por aspektigi ilin kredindaj per mencio de detalaj informoj aŭ de (falsa) fidinda fonto. Interalie cirkulas insulta ĉenmesaĝo pri imamo, kiu eĉ ne ekzistas.
Kontraŭi rasismon en Interreto ne simplas. Plej ofte ne eblas trovi la aŭtorojn. Sed la centro malfermis spacon en sia retejo por detale refuti malveraĵojn.
|
Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton:
Artikolo de Ivo Durwael el MONATO (www.monato.be). Lasta adapto de tiu ĉi paĝo: 2020-07-07 |