Kiam en septembro la litova prezidanto, Dalia Grybauskaitė, vizitis Francion, renkontis ŝin la franca prezidanto Nicolas Sarkozy kun milita orkestro kaj honora gardantaro – kaj inverse pendigita ŝtata flago de Litovio.

En la salono, kie la prezidantoj subskribis dokumenton pri strategia partnereco, pendis flagoj de Francio, Eŭropa Unio kaj de Litovio. Tamen la litova – flava, verda, ruĝa – estis inversigita.

Tial kritikis litovaj parlamentanoj la ministron pri eksteraj aferoj, Vygaudas Ušackas. Ili volis scii, kiamaniere reagis la litova delegacio. En Litovio fuŝo tia estus konsiderata malsanktigo de la flago kaj estus severe punata (eĉ ĝis malliberigo).

Klarigis Ušackas, ke okazis la konfuzo nek en Litovio nek en la ambasadejo, sed ĉe ĉambraro de Sarkozy. „Ni mem havis la eblon nek hisi la flagon, nek ĝin ŝanĝi. Francaj altranguloj jam pardonpetis”, diris la ministro.

LAST

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de last el MONATO (www.monato.be).

Lasta adapto de tiu ĉi paĝo: 2020-07-07