Revenigi la ostojn de Patrino Terezo al Albanio celis lastatempe la albana registaro. La bonfarinto naskiĝis kiel Agnes Gonxhe Bojaxhi en Skopjo (nun en Makedonio). En 1928 ŝi foriris al Irlando kaj fariĝis monaĥino. Ŝi mortis en 1997 en Barato kaj estas tie entombigita.

La albana reĝimo komunisma dum 45 jaroj malpermesis al ŝi viziti la landon, kie vivis kaj mortis ŝiaj familianoj. Nur en 1989 ŝi vizitis Albanion, kiam la reĝimo klopodis prezenti al la mondo pli liberan impreson. Poste ŝi plurfoje revenis kaj starigis en Albanio bonfarajn organizaĵojn.

Aŭtoritatoj en Barato negative respondis al la albana propono. Tamen Albanio ankoraŭ esperas konvinki Baraton pri siaj rajtoj. Cetere la albana registaro provas revenigi la ostojn de ĉirkaŭ 30 aliaj eminentuloj ekzilitaj de la komunisma reĝimo kaj eksterlande mortintaj. Ili inkluzivas eksan reĝon, Ahmet Zogu, kaj eksan ĉefministron, Theofan Stilian Noli.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el MONATO (www.monato.be).

Lasta adapto de tiu ĉi paĝo: 2020-07-07