Okaze de la 30-jariĝo de la Internacia Centro de Unuiĝintaj Nacioj en Vieno kaj de la aŭstra prezido de la Sekureca Konsilio de UN en novembro aperis libreto kun instrumaterialoj por mezlernejoj. Preparis la tekstojn fakuloj de la ministerioj pri eksterlandaj aferoj kaj pri instruado, helpe de la informservo de UN en Vieno.

En ĉapitroj, kiuj rilatas al aŭstraj instruplanoj, la gelernantoj ricevas superrigardon pri la historio, strukturo kaj ĉeftaskoj de UN samkiel pri la rolo de Aŭstrio en ĝi.

Simulado

La materialoj, sub titolo „Kune fortaj – Unuiĝintaj Nacioj”, estas verkitaj por infanoj ekde la aĝo de 13 jaroj. Aperas ekzemple kvizo pri simulado de la Sekureca Konsilio, per kiu gelernantoj povas pli bone kompreni la decidajn procezojn en la plej altranga UN-organo.

La aŭstra ministro pri eksterlandaj aferoj, Michael Spindelegger, kiu kunlanĉis la libreton, diris: „Ĝuste la temoj, kiuj la gejunulojn interesas – klimatprotektado, batalo kontraŭ malriĉeco kaj sekurigo de paco – postulas aktivan internacian engaĝon. Ni devas havi la komunan deziron peri ilin al la lernejoj.”

Ekzemplerojn de la libreto oni sendis al ĉiuj mezlernejoj en la lando. Reagoj de instruistoj kaj lernantoj tre favoras.

Evgeni GEORGIEV

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Evgeni Georgiev el MONATO (www.monato.be).

Lasta adapto de tiu ĉi paĝo: 2020-07-07