La glacio degelas dramece. Kilimanĝaro, la plej alta monto de Afriko, jam perdis 80 procentojn de sia glacikovro. Kaj kiel la klimata ŝanĝiĝo influas tiun monton, povis vidi anoj de la internacia klimatprotekta iniciato Greenpeaks kune kun aŭstraj alpistoj.

Montara gvidisto Faustino precize esprimas: „Se ni nun ne priatentos niajn naturon kaj montojn, tiuokaze ĉio estos perdita!” Tiu 65-jarulo jam pli ol 350-foje grimpis la 5895 m altan pinton Uhuru en la orientafrika Tanzanio. „Glacio iĝas videble malpli multa. Tio estas rezulto de la tutmonda varmiĝo en la pasintaj 100 jaroj.”

Greenpeaks alvokas nun de sur la pinto de Kilimanĝaro ĉiujn alpistojn por kunlaboro kaj subteno de la tutmonda klimatprotekta kampanjo Seal the Deal! (Sigelu la kontrakton!) de la Naturprotekta Programo de UN (UNEP). La celo de la programo estas, ke ĉiuj landoj subskribu novan klimatprotektan konvencion por bremsi la tutmondan varmiĝon. La voĉo de alpistoj tre gravas ĉe UNEP, ĉar ili estas veraj atestantoj de la efikoj de la klimatŝanĝiĝo al la sentivaj ekologiaj montsistemoj.

La de la alpistoj sur Kilimanĝaro etenditan standardon Seal the Deal! oni uzis unuafoje dum la Tutmonda Klimata Semajno de la 21a ĝis la 25a de septembro 2008 kaj poste transportis al la montosupro.

Greenpeaks estas internacia iniciato pri klimatprotekto, kiu atentigas dum plej superaj renkontiĝoj de ŝtataj kaj registaraj estroj pri la klimatŝanĝiĝo kaj invitas ĉiujn alpistojn, vojaĝantojn kaj naturamikojn partopreni. En Interreto: www.greenpeaks.org.

Evgeni GEORGIEV

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Evgeni Georgiev el MONATO (www.monato.be).

Lasta adapto de tiu ĉi paĝo: 2020-07-07