Rezulte de balotoj en junio 2009 la demokratoj de Sali Berisha ricevis 70 lokojn el la 140 en la parlamento. Pro tiu ĉi malvenketo la demokratoj sukcesis krei novan registaron nur helpe de unu el la opoziciaj partioj (Socialista Movado por Integriĝo, estrata de Ilir Meta).

La socialistoj de Edvin Rama (ekde 2000 la urbestro de Tirano), kun 64 lokoj, formale agnoskis la rezulton de la balotoj. Tamen, kiel kondiĉo por partopreni en la nova parlamento, la socialistoj insistis, ke balotilaj kestoj en kelkaj urboj estu malfermitaj. Tion kontraŭis la demokratoj, dirante, ke ĉio jam estas decidita de balotkomisionoj.

Deputitoj

Intertempe Rama, kiu laŭstatute rezignu pri sia posteno post la malvenko, kvankam malgranda, kontraŭe rekandidatiĝis kiel partiestro kaj instigis siajn deputitojn ne aliĝi al la parlamento. Dume, socialistoj amase, tra la tuta lando, protestis, postulante, ke oni malfermu la balotilajn kestojn. Reciproke manifestaciis ankaŭ demokratoj, okaze de sia partia kongreso, apoge al la estraro.

Tio signifas, ke la parlamento funkcias kvazaŭ unupartia, kiel dum la tempo de komunismo. Albanoj kaj iliaj amikoj eksterlandaj esperas, ke la situacio malstreĉiĝos, tiel ke la lando iam povos aliĝi al Eŭropa Unio.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el MONATO (www.monato.be).

Lasta adapto de tiu ĉi paĝo: 2020-07-07