Pereo de la preĝejo ĉiam estas ĉagrena afero por eklezia komunumo. Antaŭ Kristnasko litovojn ŝokis informo, ke dum profunda nokto, la 21an de decembro, subite, supozeble pro difekto en elektroinstalaĵo, ekflamis ligna preĝejo de la litova urbeto Labanoras. La preĝejo de la Naskiĝo de la Sankta Virgulino Maria brulis totale. Fajroestingistoj sukcesis savi nur la apude starantan lignan sonorilejon.

La unua preĝejo de la Naskiĝo de l' Sankta Virgulino Maria menciiĝas en 1522. Ankaŭ ĝi pereis pro incendio. Tamen oni strebis al rekonstruo de la sanktejo. Per kolektita mono ĝi reaperis en 1820. Onidire la preĝejo estis rekonstruita en mirakla loko. Unu fruan matenon sur la monteto homoj trovis per mirakla povo translokitajn lignajn trabojn destinitajn por la konstruo kaj bildon de Sankta Maria pendigitan sur alta stango. Ekde tiam la 8an de septembro en Labanoras oni festas la naskiĝtagon de la Sankta Virgulino Maria.

La sanktejo entenis 17 artajn valoraĵojn – bildojn „Maria”, „Sidanta Kristo”, portretojn de la 12 apostoloj, ankaŭ valorajn orgenon, kandelingojn. Ankaŭ la artaĵoj pereis en la fajro.

La eklezio kaj la tuta socio multe bedaŭris la okazintaĵon. Loĝantoj de Labanoras, kiuj perdis la propran preĝejon, komencis kolekti monrimedojn por rekonstruado de la sanktejo. Oni intencas komenci la laborojn printempe.

last

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de last el MONATO (www.monato.be).

Lasta adapto de tiu ĉi paĝo: 2020-07-07