Politiko

BALKANIO

Paralela ne plu

Post lokaj balotoj en Kosovo, en kiuj partoprenis serboj, en la municipo Ŝterpce estis elektita Bratislav Nikolić, kiu gajnis pli ol 60 % de la voĉoj. Tamen Zvonko Mihajlović, aginta ekde 1988 en paralela institucio serba, ne volis eksiĝi.

Pro la insisto de Nikolić la administracio de Kosovo aplikis sian povon. Do, anstataŭ paralelaj institucioj serbaj, direktataj kaj subtenataj de Beogrado, almenaŭ kelkaj municipoj serbaj akceptis la aŭtoritaton de la nova kosova ŝtato. Simile okazis en Graĉanica kaj aliaj urboj loĝataj plejparte de serbaj etnanoj.

Tio siavice helpos la pacan progreson kaj evoluon de la regiono. Menciindas, ke la novaj instancoj de Graĉanica sendis helpon al la albana regiono Shkodër, trafita de inundo. Tiamaniere ili reciproke helpis, ĉar la albana registaro subtenis la rekonstruon de domoj en Graĉanica.