Leteroj

Ĉu satanisto povas administri ekleziojn? (2)

Mi ĝojas pri legantoj, kiuj kun intereso legas la prireligiajn artikolojn kaj komentojn, speciale se ili tion faras arde, kun vera animintereso. Sed malpli mi ĝojas, se iu paralele kun animardeco kaj fervoro forgesas pri preciza legado kaj pri logiko. Mi havas impreson, ke tio okazis en la reagletero de Armando Zecchin (MONATO 2010/3, p. 6). Li supozas pri mia artikolo aferojn, kiujn mi ne nur ne esprimis, sed ilin eĉ klare kontraŭdiris. Tiel mi jam en la unua alineo diris: „Mi estu justa: ne temas nepre pri vera satanisto, sed pri akuzo de unu el la ekzistantaj religiaj komunumoj en Slovenio ...” Do neniu povas al mi riproĉi konsideri sinjoron Gulič satanisto. Kiel Armando Zecchin prave diras, mi vere ne povas scii, ĉu li estas ateisto, kiel li asertas, aŭ ne. Tamen, eble sinjoro Zecchin povus klarigi, ĉu estas verŝajna la supozo, ke oni estas nove naskita en la kristana senco, kaj tamen demonstras proksimon al proklamitaj satanistoj kaj asertas esti ateisto?

Mi supozas, ke Armando Zecchin ne intencis protekti sinjoron Gulič antaŭ mia (cetere neokazinta) atako, sed ke lin provokis mia tezo, ke rilate la novnaskiĝon la ateisto kaj la katoliko troviĝas je sama pozicio; kaj se tiel, ili ankaŭ same, se vere kredante tion, kion instruas ĉu la katolika ĉu la ateisma religioj, estas kandidatoj por satanisma aparteno. Neniun personon mi markis per la nomo ateisto aŭ katoliko aŭ satanisto. Mi ne havas envidon en la koron de la homoj, do mi ne povas scii, kiu estas nove naskita kaj kiu ne. Nur Dio scias. Sed mi ne parolis persone, mi parolis principe. Kaj principe la ateisma, rekte satanisma aŭ katolika religioj ne per samaj instruoj, sed tamen per sama distanco de la biblia instruo, troviĝas samdistance de la vera kristana kredo kaj tiel ankaŭ de la efektiva novnaskiĝo.