Kuracado per ridado, nomata gelototerapio (el la helena gelos, rido), ĉiam pli ofte aplikatas en malsanulejoj. Ridi povas sanige efiki sur korpon kaj menson, helpi sangocirkuladon kaj flankenigi streĉon.

Verŝajne en ĉiuj lingvoj estas proverboj kaj diraĵoj pri ridado aŭ ridetado similaj al la angla keep smiling aŭ la pola smiech to zdrowie. Certe, ridi alproksimigas homojn kaj kreas simpation, plibonigante homan memsenton. Ĝi efikas kontraŭ doloroj, estigante t.n. hormonojn de feliĉo.

Amikeca

Tial ridado plenumas gravan socian rolon. Homoj gajaj kaj ridetantaj estas pli rapide akceptataj en la socio kaj pli ŝatataj. Tamen speciale en malsanulejoj ĝi havas apartan signifon. Per ridoj la ejo fariĝas pli amikeca, malpli timiga. Pli agrable pasas la kuracado kaj pli rapide revenas paciento al sia hejmo.

La teorio pri gelotologio devenas de la usona kuracisto Patch Adams, kiu vestis sin kiel klaŭno por gajigi malsanajn infanojn. Alia usona kuracisto, Norman Cousins, aplikis la teoriojn kaj, dum li grave malsanis, telespektis komediojn kaj legigis al si humurajn librojn. Post tia terapio pliboniĝis lia sanstato.

Eble utilus apliki ridoterapion en la propra vivo por resti sana kaj sendolora.

Stanisław ŚMIGIELSKI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Stanisław Śmigielski el MONATO (www.monato.be).

Lasta adapto de tiu ĉi paĝo: 2020-07-07