Jam de jardekoj regas la aŭstran ĉefurbon Vieno la socialdemokratoj, nun eĉ per absoluta plimulto. Tamen, por montri demokratiemon, la socialdemokratoj organizis pridemandadon de la popolo en februaro 2010. La kostoj estis 7 000 000 eŭroj. Jen la rezulto:

1) Ĉu ree deĵoru novtipa prizorganto por multloĝejaj domoj? 84 % jes.
2) Ĉu estu eblo viziti tuttagan lernejon (8a ĝis 16a horo) por ĉiu lernejano? 77 % jes.
3) Ĉu oni pagu imposton por aŭtoveturado en la centraj distriktoj de Vieno? 77 % ne.
4) Ĉu semajnfine la metroo en Vieno funkciu tutnokte (kvankam ekzistas noktaj buslinioj)? 55 % jes.
5) Ĉu posedantoj de tiel nomataj batalhundoj havu specialan permesilon? 89 % jes.

Partoprenis la pridemandadon 411 075 personoj aŭ 35 % de la loĝantaro. Temis pri la due plej bona rezulto.

La opozicio kritikis la proponitajn kromtekstojn, ĉefe por la dua demando: „Internaciaj esploroj pruvas, ke tuttaga lernejo estas ĉefa kondiĉo, se gepatroj volas profesie labori kaj samtempe havi infanojn.”

Rilate la kvinan demandon: ĉu hundo mordemas, dependas unue de la edukado de la hundo kaj de la posedanto kaj due de la raso de la hundo. Kelkaj rasoj pli mordemas, ekzemple rotvejla hundo, terhundo, mastifo kaj dogo. Eble ankaŭ ŝafhundo aperos en la listo.

Fojfoje infanojn kaj maljunajn personojn grave vundas hundo. Gvid-permesilon jam havas 3000 hundoposedantoj en Vieno.

Walter KLAG

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Walter Klag el MONATO (www.monato.be).

Lasta adapto de tiu ĉi paĝo: 2020-07-07