220 jarmilionojn antaŭ nia tempo kvar metrojn longa reptilio migris sur ŝlimo ĉe riverbordo proksime al la hodiaŭa urbo Bad Königshofen en norda Bavario. La peza besto postlasis piedsignojn pli ol dek centimetrojn profundajn, kiuj seke malmoliĝis en la suno. Iam poste sablo, kunportita de inundo, plenigis la sulkojn kaj en jarmiloj ŝtoniĝis, dum la ĉirkaŭanta ŝlimo polviĝis. Tiel konserviĝis piedsigno de tiu dinosaŭro. Laŭ la ŝtata geologo Roland Eichhorn [ajĥhorn] la fosiliaĵo estas tute eksterordinara.

Sciencistoj rekonstruis la historion de tiu piedpremsigno kaj nun esperas, ke iam troveblos pliaj fosiliaĵoj, eble kompleta skeleto. Ne konatas, kion manĝis tiu mallongfingra-mano-besto kun la scienca nomo „Brachychiroterium” (de la greka βραχυ / braĥi = mallonga; χείρ / ĥeir = mano)

La fosiliaĵo estis malkovrita hazarde okaze de kartografiaj laboroj en tiu regiono kaj estonte estos eksponata en muzeo.

Jomo IPFELKOFER

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Jomo Ipfelkofer el MONATO (www.monato.be).

Lasta adapto de tiu ĉi paĝo: 2020-07-07