Laŭ la burunda konstitucio ĉiu civitano pli ol 18-jaraĝa posedu ŝtatan identigilon. Tamen evidentis, dum registrado por balotoj en majo, ke preskaŭ duono de la 3 550 000 voĉdon-rajtigitoj ne havis kun si identigilon.

Kulpas la fakto, ke la plimulto de la burundanoj scipovas nek legi nek skribi. Ili ne komprenas la gravecon de dokumentoj tiaj. Nur komercistoj kaj vojaĝemuloj ilin posedas pro postuloj de polico aŭ bankoj. Krome rifuĝintoj el Tanzanio, kiuj lastatempe hejmenrevenis, aldoniĝas al la nombro de tiuj sen identigiloj.

Malgraŭ tio, multaj homoj raportas, ke fraŭdemuloj provas akiri multajn identigilojn, por voĉdoni pli ol unu fojon.

Jérémie SABIYUMVA

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Jérémie Sabiyumva el MONATO (www.monato.be).

Lasta adapto de tiu ĉi paĝo: 2020-07-07