La ĉefa placo, nomata placo Skanderbeg, en la albana ĉefurbo Tirano, estis rekonstruita en 1986. Ekde tiam la placo pro neglekto kadukiĝas. Ekzemple, ĉe la fasado de la Palaco de Kulturo kaj eĉ en ĝi, la marmoro detruita dum protestoj en 1991, kiam oni faligis la statuon de la diktatoro Enver Hoxha [hodĵa], ankoraŭ ne estas riparita.

Antaŭ tri jaroj la urbodomo en Tirano ricevis tri milionojn da usonaj dolaroj el Kuvajto por restaŭri la placon. La laboro ankoraŭ ne komenciĝis. Pro tio la landa registaro forte kritikis la lokan socialistan urbestraron, kiu siavice akuzis la registaron, ke tiu ne finance helpis okaze de konstruado de ringpasejo ĉirkaŭ la placo.

Cetere daŭras kvereloj pri nova plano por la centro de Tirano. La urbodomo antaŭvidas altajn, ĉielskrapantajn konstruaĵojn, dum la civitanoj ankoraŭ suferas pro la malbona stato de sia ĉefa placo kaj pro manko de spaco kaj por trafiko kaj por ripozo.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el MONATO (www.monato.be).

Lasta adapto de tiu ĉi paĝo: 2020-07-07