Unuafoje paradis en Litovio samseksemuloj. Jam de longe ne kuraĝis la instancoj permesi eventon tian, timante malaprobon kaj kontraŭstaron, sed fine okazis en majo la aranĝo „Por la egaleco”.

Partoprenis la paradon en la ĉefurbo Vilnius ĉirkaŭ 300 homoj. Ĝin salutis la sveda ministrino pri EU-aferoj, Birgitta Ohlson, kaj membroj de la eŭropa kaj litova parlamentoj. Ili substrekis la gravecon de la evento rilate defendadon de homaj rajtoj en Litovio.

Kolbasetoj

Anocis afiŝoj: „Kial mia amo kaŭzas vian malamon?”, „Por familia diverseco” kaj „Amo ne konas seksojn”. Gardis la paradantojn ĉirkaŭ 800 policistoj kontraŭ tiuj, kiuj krie esprimis sian koleron kaj ĵetis botelojn, kolbasetojn, kaj eĉ fumo-bombon. Du parlamentanoj saltis super barilo kaj atakis paradantojn. La polico arestis entute 19 agresintojn.

Kelkdeko da homoj esprimis sian malkontenton ĉe la katedralo de Vilnius, kie ili preĝis „por savi Litovion”. Alia petis la demision de la urbestro de Vilnius. Leviĝas do la demando, ĝis kiu grado Litovio fakte toleremas.

LAST

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de last el MONATO (www.monato.be).

Lasta adapto de tiu ĉi paĝo: 2020-07-07