Politiko

HUNGARIO

Nova vento

Trablovas Hungarion nova politika vento. Parlamentaj balotoj en aprilo forbalais ok jarojn da socialista regado. La malvenkon kaŭzis ne nur la ekonomia krizo sed ankaŭ korupto.

En la unua balot-rondo laŭ lista sistemo la dekstruloj ricevis 53 % de la voĉoj kaj samtempe grandan parton de la individuaj kandidatoj. En la dua rondo ili ĉie venkis krom en tri seĝoj. La nova ĉefministro fariĝis Viktor Orbán, kiu ĉefministris inter 1998 kaj 2002.

Ciganoj

Lia partio rajtas ŝanĝi ĉiujn leĝojn, eĉ la konstitucion, ĉar ĝi disponas pri necesa plimulto. Ŝanĝoj, tamen, ne solvos ĉiujn problemojn. Unu el tiuj koncernas ciganojn. Nova kaj ekstrema partio, Jobbik, kampanjas kontraŭ ciganoj. Orbán nepre solvu la cigano-problemon ĉar, se ne, Jobbik plifortiĝos.

Tamen la plej granda tasko estas solvi la financan krizon. Laŭ plej freŝaj sciigoj la lando jam iomete eliris la krizon, sed senlaboreco restas alta (11 %), kaj same la internacia ŝuldo. Orbán havos ankaŭ alian taskon. En la sekva jaro li estos laŭvica prezidanto de Eŭropa Unio. Tial Hungario devas prezenti laŭeble plej bonan profilon al la eŭropaj politikistoj.