Politiko
ALBANIO
Suferas la ĉevaloj
Malsatstrikas membroj de la opozicia albana socialista partio, stariginte tendaron inter la ĉefministrejo kaj la parlamentejo en Tirano.
En la tendaro enfermis sin 200 homoj, inkluzive de 20 deputitoj de la partio estrata de Edi Rama. La malsatstrikantoj postulas, ke oni malfermu balotilujojn de la elektoj de junio 2009, kiam ambaŭ ĉefaj partioj gajnis preskaŭ saman nombron de sidlokoj en la parlamento.
Rezultoj
La Demokratoj, nun regantaj kun socialista frakcio, kontraŭas, dirante, ke la rezulton jam konfirmis la koncernaj juĝejaj instancoj. La Demokratoj timas, ke, malferminte la ujojn, oni trovos, ke la rezultoj de la balotoj estas manipulitaj.
Kelkaj strikantoj jam forlasis la tendaron pro sanaj kialoj. Intertempe la striko damaĝas la reputacion de Albanio en Eŭropa Unio, lezante la aspirojn de albanoj libere moviĝi tra EU. Laŭ popola proverbo: „Kiam la ĉevalistoj kverelas, suferas la ĉevaloj”.
.|
Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton:
Artikolo de Bardhyl Selimi el MONATO (www.monato.be). Lasta adapto de tiu ĉi paĝo: 2020-07-07 |