En 2008 okazis konflikto en Sud-Osetio, en kiu precipe Rusio partoprenis. Du jarojn poste parolis la prezidanto de Sud-Osetio, Eduard Kokojti, pri sia lando. En intervjuo kun la rusa patriota gazeto Zavtra (Morgaŭ) li diris, ke la fakto, ke kelkaj ŝtatoj, inkluzive Rusion, nun agnoskas Sud-Osetion, realigis almenaŭ parte lian revon pri la osetia gento.

Abiturientoj

„Antaŭ la agnosko de Rusio,” daŭrigis la prezidanto, „la popolo vivis sub daŭra timo pri agreso de la flanko de Kartvelio. Nun, tamen, estas rekonstruata la lando. Kunlaboras rusaj specialistoj por krei lernejojn kaj malsanulejojn, dum abiturientoj el Sud-Osetio studas ĉe prestiĝaj rusaj altlernejoj.”

Helpas la rekonstruadon pli stabila situacio en la regiono. Ĉesis militoj en Ĉeĉenio kaj konfliktoj en Sud-Osetio kaj Abĥazio. Tio ebligos al prezidanto Kokojti plenumi sian politikon pri proksimiĝo al aliaj gentoj. Tamen la rilatoj kun Rusio kolizias kun la ŝtataj interesoj de Kartvelio, kio eble kaŭzos problemojn en la estonteco.

Dmitriy VLASSOV/pg

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Dmitriy Vlassov/pg el MONATO (www.monato.be).

Lasta adapto de tiu ĉi paĝo: 2020-07-07