Aperis sur T-ĉemizoj mapo pri la tiel nomata Granda Bulgario. Surprize estas, ke oni permesas la publikigon de mapo, kiu memorigas pri la tempo antaŭ mil jaroj, kiam bulgaroj regis preskaŭ la tutan Balkanion. En Albanio ankoraŭ troveblas kelkaj bulgardevenaj loknomoj.

Certe ankoraŭ ekzistas en Bulgario nostalgiuloj pri la pasintaj imperiaj tempoj. Tamen mapo tia – montranta Bulgarion inter la tri maroj Nigra, Egea kaj Adriatika – povus ofendi najbarajn landojn. Dubindas, ekzemple, ĉu en Albanio videblus simila mapo pri Etna Albanio, kiun najbaroj konsiderus Granda Albanio. Aliflanke pluraj albanoj akiris bulgaran civitanecon por pli facile moviĝi tra Eŭropo.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el MONATO (www.monato.be).

Lasta adapto de tiu ĉi paĝo: 2020-07-07