La turisma administrado de Kongo ne havas propran oficejon. Ĉiutage la funkciuloj iras al sia laborejo, sed pro manko de lokoj ili devas labori ekstere. Kian laboron ili povas fari en tia hontiga situacio?

Plia problemo estas, ke la homoj ne sufiĉe enspezas por plenumi siajn taskojn. Ili ricevas nur pli-malpli 4000 kongajn frankojn (proksimume 4 eŭrojn) kaj 8000 frankojn kiel premion monate, sed la premioj, kiujn la ŝtato promesas, ne alvenas ĉe ili.

Necesas stimuli la turisman sektoron, sed kie komenci? Ekzemple mankas busoj por transporti la turistojn kaj la funkciuloj ofte ne havas sufiĉe da profesiaj scioj. La ministro nur atentas pri la naturaj kaj ekologiaj sektoroj, forgesante ke la turisma sektoro evoluu kune.

Aliaj landoj disvolviĝas pro sia turisma sektoro, malgraŭ la lingvaj kaj aliaj baroj. La kongaj geestroj adiaŭu siajn malbonajn kondutmanierojn por ke la lando antaŭeniru.

Nelly MASSEMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Nelly Massemi el MONATO (www.monato.be).

Lasta adapto de tiu ĉi paĝo: 2020-07-07