Moderna vivo

SPIONADO

Malsekretaj sekretoj

Antaŭ mondaj amaskomunikiloj kaj mirigitaj televidspektantoj, ĝuste kiel en la tempo de la tiel nomata malvarma milito, okazis interŝanĝo de sekretaj agentoj inter Usono kaj Rusio. Unu detalo altiras la atenton: la menciita epoko ne plu ekzistas, sed la loko restas la sama – Vieno.

Tiu ĉi urbo havas longan historion de spiona agado. En ĝi estas ĉio necesa, por ke agent-interŝanĝo okazu absolute glate. Kaj do, 20 jarojn post la falo de la tiel nomata fera kurteno, spionoj kaj rezidantoj fartas tre bone en la ĉefurbo de la neŭtrala Aŭstrio.

Informantoj

„Ĉiuj sekretaj servoj, kiuj agadis ĉi tie dum la malvarma milito, ĉeestas ankaŭ nun”, diras la historiisto Siegfried Beer, gvidanto de la Aŭstra Centro pri Spionado, Propagando kaj Sekurecaj Esploroj. Laŭ la donitaĵoj, pri kiuj disponas Beer, en Vieno nuntempe aktivas inter 2000 kaj 3000 sekretaj agentoj kaj informantoj. Multaj el ili okupiĝas pri ekonomia aŭ teknologia spionado, ĉar politika spionado perdis sian gravecon.

Aŭstrio estis centro de internacia spionado ekde la fino de 19a jarcento, kiam ĉi tien venis homoj el ĉiuj partoj de la granda monarkio Aŭstrio-Hungario. Ties disfalo kaj ankaŭ la politika malordo en meza Eŭropo post la unua mondmilito kaŭzis, ke ĉiam pli da sekretaj servoj lokis sian rezidejon en Vieno.

Post la dua mondmilito oni dividis la urbon en kvar zonojn, en kiuj la sekretaj servoj de la okupantaj landoj konkurencis en la kolektado de sekretaj informoj. Ĉekape de la agenta agado tiutempe estis la usona CIA kaj sovetunia KGB.

Sabotaĵoj

Kiam en 1955 Aŭstrio akceptis neŭtralecon, la aliancanoj retiriĝis kaj revokis el Vieno multajn sekretajn agentojn. Aliflanke restis multaj. La spionoj plu interŝanĝis informojn kaj monon kaj uzis Vienon kiel bazon por plani sekretajn operaciojn, sabotaĵojn kaj eĉ murdojn.

La streĉita epoko de la malvarma milito malaperis, sed la sekretaj agentoj kiel antaŭe plu ĝuas la gastamon de la aŭstra ĉefurbo. Tamen, laŭ Siegfried Beer, se la sekretaj agentoj ne spionas kontraŭ Aŭstrio, tiuj neniun aŭstron povas maltrankviligi.