En la golfo de Bengalio apud Barato kaj Bangladeŝo troveblis insulo 3,5 km longa kaj 3,0 km larĝa. Nomis ĝin Barato Nova Moore kaj Bangladeŝo Suda Talpatti. Jam de 30 jaroj disputis ambaŭ ŝtatoj pri suvereneco de la insulo.

Nun, tamen, superfluas disputado. Pro la altiĝo de la marnivelo la insulo simple ne plu ekzistas. Tion konfirmis Sugata Hazra, profesoro pri marstudoj ĉe la universitato de Kalkato, surbaze de satelitaj fotoj.

Ankaŭ aliaj landoj estas tiel minacataj. Maldivoj, insularo en Hinda Oceano, malaperos sub la maro, se la mondo nenion faros. Pasintjare la prezidanto de Maldivoj, Mohamed Nasheed, portante skafandron, kunvenis kun sia kabineto kvin metrojn sub la maro, por atentigi pri la problemo.

Marnivelo

Avertis la prezidanto: „Se Maldivoj ne ekzistus, neniu povus plu ekzisti en la mondo.” En Maldivoj homoj vivas nur 2,1 metrojn super la marnivelo, kiu ĉiujare kreskas.

En Nepalo, kie homoj multiĝas kaj arbaroj malmultiĝas, kunvenis ministroj pasintjare en Kalapather (5250 m alta). Ili timas, ke glaciriveroj en la tiea montaro degelas, kio kaŭzos katastrofojn en ilia lando.

Nepras do pripensi, kio fareblos por mildigi la efikojn de monda varmiĝo. Eble oni malpli uzu akvon, kaj serĉu energion el renovigeblaj fontoj.

Navin Lal SHRESTHA/pg

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Navin Lal Shrestha/pg el MONATO (www.monato.be).

Lasta adapto de tiu ĉi paĝo: 2020-07-07