La montara tereno de Albanio malfaciligas veturadon. Aldone la komunisma reĝimo ĉiam konstruis laŭ strategiaj pli ol ekonomiaj celoj. Tial precipe la nordo, najbare al Kosovo, suferis pro vojoj sen tuneloj kaj necesaj pontoj. Por atingi la landlimon per buso, nur 200 km for de la ĉefurbo Tirano, necesis naŭ horoj.

Tial la albana registaro antaŭ ses jaroj decidis konstrui novan vojon pli mallongan kaj havantan centojn da pontoj kaj tunelon ĉirkaŭ ses kilometrojn longa, kiu ebligos atingi la landlimon ene de tri horoj.

La vojo estas preskaŭ preta. Jam de unu jaro pli ol miliono da homoj kaj dekmiloj da aŭtoj kaj kamionoj uzas ĝin por atingi ne nur la nordon de Albanio sed ankaŭ Kosovon, Makedonion kaj Serbion.

Komence de 2010 ankaŭ la registaro de Kosovo decidis konstrui similan ŝoseon, kiu estos ligita al tiu en Albanio. La nova vojo atingos Serbion ĉe la limpunkto Merdar.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el MONATO (www.monato.be).

Lasta adapto de tiu ĉi paĝo: 2020-07-07