Lastatempe oni multe parolas pri pedofilio. Temas pri socia plago, kiu atingas eĉ edukistojn kaj eklezianojn, do tiujn, kiuj ege pli ol aliaj homoj estas vokataj por protekti infanojn. Oni scias, ke la diversaj institucioj kontraŭbatalas per ĉiuj fortoj tiun fenomenon por identigi la kulpulojn kaj ilin punigi, tiel malebligante, ke estu novaj viktimoj. Tamen ne ĉiam facilas tion fari.

Verŝajne ne ĉiu scias, ke pedofiliuloj pli kaj pli ofte utiligas specifajn emblemojn por reciproke sin rekoni. Tiuj simboloj, kiuj videblas ekzemple ĉe kolĉenoj, pendaĵoj, brakringoj aŭ tatuoj, disvastiĝas ankaŭ interrete. Estus bone, se ordinaraj civitanoj rekonus ĉi tiujn emblemojn, por pli bone protekti sin kaj familianojn kontraŭ pedofiliuloj. Eblus tiel, en plej suspektindaj kazoj, eĉ denunci la portanton de tia emblemo al la polico.

Papilio

Emblemoj antaŭ nelonge malkovritaj jenas: du bluaj trianguloj, unu interne de la alia, indikas preferon pri knaboj (stiligitaj trianguloj indikas preferon pri tre malgrandaj infanoj); du rozkoloraj koroj, unu interne de la alia, indikas preferon pri knabinoj; papilio kun korformaj, rozkoloraj kaj bluaj flugiloj indikas preferon pri ajnaj infanoj.

Oni provu distingi ĉi tiujn emblemojn por sin gardi kontraŭ tiaj perversiuloj. Se oni iomete atentas kaj kunlaboras, eble ne estas tiel malfacile preventi novajn krimojn.

Roberto PIGRO

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Roberto Pigro el MONATO (www.monato.be).

Lasta adapto de tiu ĉi paĝo: 2020-07-07