En aŭtuno okazis en Hungario tutlandaj municipaj balotoj. En pli ol 3200 municipoj oni elektis urbestrojn kaj estrarojn. En 400 lokoj prezentis sin nur unusola kandidato kiel urb- aŭ vilaĝ-estro. Tie sufiĉis nur unu valida voĉo.

La kampanjo estis mallaŭta kaj enuiga, ĉar la partioj kvazaŭ akceptis la rezultojn de la printempaj parlamentaj balotoj. Okazis nenio nova: furoris la dekstruloj, kiuj preskaŭ ĉie venkis.

Tiel, post 20-jara liberaldemokrata erao, ankaŭ Budapeŝto apartenas al la dekstruloj. Nur la suda urbo Szeged [seged] apartenas al la socialistoj, sed tie la urbestraro havas dekstran plimulton. En vilaĝoj, kie oni voĉdonas pli por personoj ol partioj, ofte venkis sendependuloj.

Bloko

La nuna venko spegulas la socialisman epokon, kiam ĉie venkis la „Patriota Popolfronto”. Nun tamen dekstra bloko regas kaj la parlamenton (kun rajto modifi eĉ la konstitucion) kaj la municipojn.

Tiel kreskis la respondeco de la ministrestro Viktor Orbán. Lia mandato daŭros preskaŭ kvar jarojn, dum kiuj li devas krei stabilan ekonomion spite internacian krizon.

Karlo JUHÁSZ

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Karlo Juhász el MONATO (www.monato.be).

Lasta adapto de tiu ĉi paĝo: 2020-07-07