Moderna vivo
ALBANIO
Trezoro disputita
En albanaj teritorioj dum la otomana periodo, precipe dum la lastaj jardekoj de la 18a kaj la unuaj de la 19a jarcentoj, regis du paŝaoj albandevenaj, Buŝatlioj norde kaj Ali Paŝao Tepelena sude.
La du homoj riĉiĝis, kaj la trezoro de Ali Paŝao fariĝis legenda sed samtempe mistera. Laŭdire konservis ĝin lia lasta junaĝa edzino Vasiliki. Pro tio arkeologoj grekaj kaj aŭstraliaj decidis serĉi la trezoron en vilaĝo portanta la nomon de Vasiliki, 300 km norde de Ateno.
Krizo
Parto de la trezoro, se trovita, tuj transpasus al la greka registaro, kiu aktuale troviĝas en financa krizo. Tamen leviĝis voĉoj en Albanio, protestante, ke la trezoro – eble 30 tunoj da oro – aparteninta al albana paŝao iru al Albanio.
Fosadis kaj fosadis la trezorserĉistoj sed trovis fine, anstataŭ oron, nur profundan, ordinaran kaj malplenan puton. Okazis kiel diras albana proverbo: la monto gravediĝis sed fine naskis nur muson.
|
Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton:
Artikolo de Bardhyl Selimi el MONATO (www.monato.be). Lasta adapto de tiu ĉi paĝo: 2020-07-07 |