Leteroj

Volo de la popolo?

Jomo Ipfelkofer (MONATO 2010/12, p. 12) provas pritaksi eksterparlamentajn eventojn en Germanio. Volonte mi plendus kun li pri misstrukturoj en la socio kaj la politika vivo, se liaj vidpunktoj, liaj akuzoj kaj postuloj estus malpli unuflankaj, partiaj, simplasloganaj. Ne intencante aldoni ekvilibrigajn komentojn al liaj konstatoj (jam ja rezistinte komenti kelkajn similajn liajn pasintece), mi nur volas averti kaj montri, kiakoloraj estas liaj okulvitroj. El la lasta kontribuo lia oni povas dedukti, ke laŭ Ipfelkofer statas tiel:

Morale bona estas rezisto kontraŭ politikistoj, se ĝi direktiĝas kontraŭ „kristandemokrataj konservativuloj”, kiuj „kutime ne volas ŝanĝi lernejan sistemon”, pelas la policon ataki pacajn manifestaciantojn kaj „perfidas la volon de la popolo” – vidu Stutgarton.

Malmorala estas rezisto kontraŭ la celoj de verdula ministrino, ĝi estas eĉ renverso de la parlamenta demokratio, aparte se ĝi venas el riĉaj kvartaloj, de „arkitektoj, advokatoj, kuracistoj kaj bankistoj”, tio estas „alianco de konservativa etburĝaro” (tiel!) – vidu Hamburgon.

Do tia dumezura taksado dependas ne de faktoj, sed de individuaj sentoj kaj preferoj, kio en gazeto aperu eble sub Opinio, sed ne kiel objektiva raporto. Kaj artikolisto traktu nociojn kiel „demokratio”, „volo de la popolo”, „justeco”, „ŝancegaleco” tre prudente. Ilia signifo povas oscili inter vakua vorto kaj mortiga bastono.

La aktuala situacio en Germanio meritus pli sobran analizon, almenaŭ se temas pri informado de mondvasta publiko.