Pli da kunlaboro inter Albanio kaj Kosovo postulis la nova prezidanto de Kosovo, Behgjet Pacolli [behĝet pacoli], dum sia unua vizito al najbara Albanio.

Parolante antaŭ albanaj deputitoj, Pacolli diris, ke la nova aŭtoŝoseo Kukës-Morine Durrës, kiu kunligas la marbordon de Adriatiko kun Kosovo, estas unua paŝo. Tamen, li diris, nepras antaŭenmarŝi per pli grandaj paŝoj ekonomiaj, kulturaj kaj spiritaj. Varoj, kapitaloj, ideoj kaj homoj moviĝu libere inter la du landoj.

Elektro

Albanio kaj Kosovo tradicie subtenas unu la alian. Kosovo eksportas al Albanio cerealojn, viandaĵojn kaj elektron dum sekaj sezonoj; Albanio reciprokas per legomoj, fruktoj, salo, laktaĵoj, olivoj kaj elektro dum la vintra periodo.

Tiel eblus komuna elektroenergia sistemo, ankaŭ unuigitaj lernejaj programoj, lernolibroj, sciencaj kaj oficialaj terminoj por ĉiaspecaj dokumentoj. Komuneco povus tuŝi ankaŭ Makedonion kaj Montenegron, almenaŭ en ekonomiaj sferoj.

Tiamaniere, sekvante la modelon de Eŭropa Unio, ambaŭ landoj povus sin pretigi pli bone kaj pli efike por iam aliĝi al EU.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el MONATO (www.monato.be).

Lasta adapto de tiu ĉi paĝo: 2020-07-07