Medio

OPINIO

Klimatŝanĝaj fabeloj

Ĉu vi legis aŭ aŭdis, ke la glacio en la mondo rapide degelas kaj baldaŭ sekvos giganta inundo en la landoj proksimaj al la maro? La faktoj montras tute alian bildon.

Ĉirkaŭ la norda poluso ne estas firma tero. Naĝas sur la maro bankizo, kies dikeco estas inter kelke da centimetroj kaj 2 metroj. Vintre la bankiza areo estas ĉiujare pli-malpli 14 milionoj da km², somere nur 4 milionoj da km². Dum la lastaj jaroj la areo iom ŝrumpis. La bildo 1 montras la evoluon dum la lastaj 30 jaroj.

Pro la malgranda dikeco la tuta volumeno de la glacio estas nur 10 000 km³.

Sude de la norda poluso troviĝas Gronlando, kovrita de dikaj glaĉeroj. La glacia volumeno estas 3 000 000 km³ kaj stabila. Tiu ĉi glacio aĝas ĝis 200 000 jarojn.

Sesa kontinento

Ĉirkaŭ la suda poluso kuŝas la sesa kontinento, Antarkto, kovrita de same dikaj, malrapide kreskantaj glaĉer-tavoloj. Ili aĝas pli ol 20 milionojn da jaroj. La volumeno estas giganta: 29 000 000 km³, do 90 % de la tuta monda glacio.

Ĉirkaŭ Antarkto naĝas bankizo kaj ŝelfo, tio estas glaĉero glitinta ĝis sur la maro. Ankaŭ tiu glacio alternas laŭsezone inter 2 kaj 16 milionoj da km². Averaĝe la volumeno estas 10 000 km³. Jen la evoluo en la lastaj 30 jaroj (Bildo 2).

Alpoj

Krome ekzistas aliaj glaĉeroj en diversaj mondopartoj. Ilia volumeno estas entute nur 200 000 km³. La volumeno de ĉiuj alpaj glaĉeroj estas nur 100 km³. Tiuj glaciamasoj dum la lastaj jaroj ĝenerale ŝrumpis, kelkaj kreskis. Mondskale tio signifas nenion. Katastrofo ne okazos.

Krome ekde antaŭ 15 jaroj la tutmonda temperaturo ne plu kreskas.

En la apuda artikolo vi povas legi personan opinion pri kontestata temo. La redaktoro de la rubriko Medio havas funde alian opinion pri la temo. Se vi serĉas en la reto laŭ la serĉvortoj global warming aŭ Greenland glacier loss vi trovos amason da sciencaj artikoloj kun multegaj faktoj, kiuj kontraŭos la opiniojn de la artikolo. Jen resuma frazo: La scienca konsento pri klimatŝanĝo estas, ke „la klimato estas ŝanĝiĝanta kaj tiuj ĉi ŝanĝoj estas grandparte kaŭzitaj de homaj agado” [America's Climate Choices: Panel on Advancing the Science of Climate Change; National Research Council (2010). Washington, D.C.: The National Academies Press. ISBN 0309145880.] Ni bonvenigas viajn leterojn pri tiu ĉi temo. (Rimarkoj de la redaktoro)