Inter la mortintoj subite aperis la prezidanto de Litovio, Dalia Grybauskaitė. Kvankam efektive ne, tamen portreto de la litovino aperis en internacia funebra kaj tombeja ekspozicio en la itala urbo Bologna.

Litovoj, kiuj vizitis la ekspozicion „TaneXpo”, konsterniĝis, kiam ili ekvidis ĉe la stando de la itala entrepreno „MaxiCard” el Padova funebran foton de la litova prezidanto. Legeblis, ke ŝi mortis antaŭ kvar jaroj.

Malĝustaj

Vere la nomo de la mortinto ne estis Dalia Grybauskaitė, sed Dalia Vogel. Akompanis la malĝustan nomon malĝustaj datoj.

Atentigite pri la fuŝo, la entreprenestro, Ivo Schiavon, pardonpetis. Li diris, ke li ĝenerale uzas fotojn de siaj familianoj. Tamen lia 18-jaraĝa filino preferis mortinton pli belan kaj trovis en Interreto foton de la litova prezidanto.

LAST

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de last el MONATO (www.monato.be).

Lasta adapto de tiu ĉi paĝo: 2020-07-07