Ekonomio

JAPANIO

Japanoj ankoraŭ preferas pagi kontante

En Japanio ĝenerale maljunuloj pagas en vendejoj pli ofte per kontanta mono ol per elektronika pagilo kiel karto aŭ poŝtelefono kun QR-kodo. Por kelkaj okazoj ili krome preferas uzi freŝajn biletojn.

Mi lernas te-ceremonion. Ĉiumonate mi pagas al mia gvidantino dankmonon per freŝaj, neuzitaj monbiletoj. Por povi enmanigi novajn monbiletojn, mi iras al ŝanĝmaŝino ĉe mia banko. Mia edzino Ĉieko instruas Esperanton ĉe iu esperanta klubo. Ŝi ricevas ĉiumonate sian honorarion per novaj monbiletoj. Novaj monbiletoj montras respekton al gvidantoj. Ankaŭ geavoj kaj gepatroj, kiuj donas monon kiel novjaran donacon al siaj genepoj aŭ gefiloj, uzas novajn biletojn.

Laŭ internacia komparo de 2015 nur 18,8 % de la japanoj uzas elektronikan pagilon, dum inter koreoj 89,1 %, ĉinoj 60 %, britoj 54,9 %, svedoj 48,5 %, usonanoj 45,0 %, francoj 39,1 %, baratanoj 38,4 % kaj germanoj 14,9 %.

La kialoj de la malemo uzi elektronikan monon estas diversaj: en Japanio la risko ricevi falsajn monbiletojn estas malgranda, maljunuloj havas maltrankvilecon aŭ dubon pri la elektronika sistemo, kreditkarto kaj elektronika pago instigas al malŝparado ktp.

Dume bankistoj, industriistoj kaj vendistoj, alfrontante severan mankon de laborforto kaj helpate de la registaro, strebas enkonduki senkontantan pagsistemon. En oktobro 2019, okaze de la altigo de spezimposto (pri liverataj varoj kaj servoj) de 8 % al 10 %, la registaro enkondukis redukton de 5 % por pagoj senkontantaj kiel portempan rimedon por stimuli la uzadon de la elektronika pagsistemo. Gejunuloj facile alkutimiĝis al la elektronika mono, sed oni ne scias, ĉu olduloj, longe kutimiĝintaj al papermono kaj moneroj, estos tentataj uzi ĝin.