Scienco

ZOOLOGIO

Krustulo malkovrita (p)lastatempe

Grupo de sciencistoj el la universitato de Newcastle [njúkasal] (Anglio) malkovris ĝis nun nekonatan specion de krustulo. Ĝi nomiĝas Eurythenes plasticus kaj estis priskribita en la ĉi-marta kajero de la scienca gazeto Zootaxa.

Mariana Fosego

Ĉi tiu nova specio de krustulo estas nur 5 centimetrojn longa, kaj oni ĝin malkovris en la Mariana Fosego, inter Japanio kaj Filipinoj, je profundo de pli ol 6900 metroj.

La scienca nomo Eurythenes plasticus atentigas precipe pri la problemaro de plastaj forĵetaĵoj en la naturo. En la visceroj de unu el la krustuloj, sciencistoj trovis mikroplastan fibron, kiu estas je 83,74 % identa kun polietilena tereftalato (PET), tio estas termoplastaĵo el la familio de poliesteroj. Ĝi estas uzata ankaŭ por la produktado de plastaj boteloj, teleroj, kuireja vazaro, teksaj fibroj ktp.

Senrespondeca konduto

Mikroplastaĵoj penetras en la profundon de oceanoj diversmaniere. Ĉar la kvanto de plastaj forĵetaĵoj, kiuj atingas profundajn partojn de oceanoj, pligrandiĝas, laŭ la scienca studo kreskas ankaŭ la probablo, ke marbestoj povas pli ofte konsumi mikroplastaĵojn.

Eurythenes plasticus montras al ni, kiom grandaj estas la sekvoj de nia senrespondeca konduto, precipe rilate al la prilaborado de plastaj forĵetaĵoj. En la plej foraj partoj de nia planedo, en la plej profundaj partoj de oceano, vivas diversaj animaloj, kies korpoj jam enhavas plastojn antaŭ ol ni ekkonas ilin.