Politiko

SVEDIO

Demarŝo kontraŭ enmigrado

Ekstremdekstraj kaj fremdulmalamantaj movadoj nun prosperas en pluraj eŭropaj (kaj ne nur eŭropaj) landoj.

Svedio estas plena

En Svedio, la plej granda el tiaj partioj nomas sin Svediaj Demokratoj (svede: Sverigedemokraterna) kaj estas unu el la grandaj partioj en la parlamento.

Komence de marto, ĝia partiestro Jimmie Åkesson [okesson] vojaĝis al la turka flanko de la turka-siria landlimo, por tie propagandi inter la rifuĝantoj.

Li disdonis al ili flugfoliojn, en kiuj estis skribite (anglalingve):

Svedio estas plena.

Ne venu al ni!

Ni ne povas doni al vi pli da mono aŭ loĝigi vin.

Ni petas pardonon pro ĉi tiu mesaĝo.

Subskribo: „La popolo de Svedio, svedaj demokratoj”

Ne ĉiuj samopinias

La reago ne estis tute laŭ liaj verŝajnaj deziroj. Ne estas klare, kiom el ricevintoj povis legi la anglan, sed la mesaĝo disvastiĝis ankaŭ rete.

En Svedio estis klare, ke ne ĉiuj samopinias kun li. Estis fondita fejsbuka grupo de malsamopiniantoj kun, post kelkaj tagoj, 100 000 membroj.

Multaj konstatis, ke Åkesson ne havas rajton subskribi „La popolo de Svedio”, kaj oni multe pridiskutis eventualajn jurajn agojn.

Reago de Turkio

Kiam Åkesson estis elironta el Turkio, li venis al la flughaveno de Istanbulo, kie la policistoj venigis lin en apartan ĉambron kaj pridemandis lin.

Kiam ili finfine permesis al li eniri la aviadilon, ili informis lin, ke ekde nun li havas daŭran enirmalpermeson kaj do ne plu rajtos denove eniri Turkion.

Åkesson estas ankaŭ parlamentano, sed pro ĉi tiu vojaĝo li forestis kelkajn tagojn, kiam la parlamento debatis la aferojn pri enmigrantoj.