Politiko
RUSIO
Referendumo
Inter la 25a de junio kaj la 1a de julio okazis referendumo pri amendoj 1 al la konstitucio de la Rusa Federacio. La rezulto estis triumfa por Putin: 77,92 % de la voĉdonantoj aprobis la ŝanĝojn 2. La ĉefa modifo rilatas al la nuligo de la kalkulo de la jamaj oficperiodoj de Vladimir Putin, kiu tiel rajtos kandidatiĝi denove por la posteno de prezidento en 2024 kaj 2030. Sen la amendo, li ne havus tian eblon pro siaj jam du sinsekvaj oficperiodoj.
Konstitucio
La Konstitucio de la Rusa Federacio ne estis modifita de 1993 ĝis 2008. Tamen inter la jaroj 2008 kaj 2020 ĝi estas modifita jam kvarfoje. La unua amendo rilatis al la ŝanĝo de la oficperiodoj de la prezidento kaj de la Ŝtata Dumao (parlamento). Per unu el la postaj amendoj oni enkondukis la jaran raportadon de la registaro al la Ŝtata Dumao.
Eblas voĉdoni interrete ...
La loĝantoj de Moskvo kaj de la regiono de Niĵnij Novgorod rajtis partopreni en la voĉdonado per Interreto: tiel faris pli ol miliono da homoj. La komunista deputito Valerij Raŝkin protestis kontraŭ tio, ke la administracio de la ĉefurbo lanĉis la programon „Miliono da premioj” por tiuj, kiuj voĉdonos interrete.
... kaj dum tuta semajno
La ĉi-jara referendumo estis unue planita por la 22a de aprilo, sed estis prokrastita pro la kronvirusa epidemio en la lando. Poste la rusa prezidento subskribis dekreton pri nova dato, la 1a de julio. Fine, pro la epidemia situacio kaj por la sekureco de la loĝantaro, oni decidis, ke la rusaj civitanoj rajtu voĉdoni dum tuta semajno.
Ĉu serioza rivalo?
John Bolton, eksa konsilanto de Trump, dum intervjuo asertis, ke Trump ne estas serioza rivalo por Putin. Post tiu ĉi referendumo la pozicio de la rusa prezidento efektive estas firma. Aliflanke, kiu scias, kiu baldaŭ okupos la seĝon de lia usona kolego? En Usono proksimiĝas prezidentaj elektoj, kiuj okazos en novembro.
1. Entute en la referendumo oni voĉdonis pri 206 amendoj al la konstitucio (red.)
2. La balotilo ebligis al voĉdonanto aŭ aprobi ĉiujn proponitajn amendojn kune, aŭ malaprobi ĉiujn kune (red.)
| Tiu ĉi teksto aperis en la presita kaj en la PDF-forma versioj de Monato en la jarkolekto 2020, numero 10, p. 6. |
|
Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton:
Artikolo de Massimo Ripani el MONATO (www.monato.be). Lasta adapto de tiu ĉi paĝo: 2020-09-06 |