Leteroj

Racio kaj spiriteco povas kunekzisti

Jiří Proškovec (MONATO 2020/06, p. 25-26) kiel moderne klerigita homo, provas pruvi la neekziston de dio(j) el scienca vidpunkto. Tamen tiaj raciaj argumentoj tute ne subfosas la ekzistobazon de religioj, ĉar kredo fontas ne en racieco, sed en alia homa trajto, tiel nomata spiriteco, kies esencon raciaj priskriboj ne povas kapti. Racieco kaj spiriteco temas pri malsamaj dimensioj, kiuj senprobleme povas kunekzisti, se oni ilin ne intermiksas. Kelkaj homoj havas pli da racieco kaj / aŭ spiriteco, aliaj malpli.

Antaŭ la moderna epoko oftis miskompreno de religiemuloj, ke religio povas klarigi ĉiun aspekton de la mondo. Nun sciencemuloj emas miskompreni, ke scienco estas la sola aliro por kompreni la mondon. Blindaj kredoj, ĉu je spiriteco, ĉu je racieco, estas fanatikaj kaj unuflankaj, se ili ne agnoskas alitipajn verojn. Mi revas pri mondo, en kiu kaj religio kaj scienco komprenas la reciproke malsamajn, sed valorajn alirojn kaj rolojn en la socio.