Moderna vivo

RIFUĜINTOJ

Nova pinta kvanto

Unuiĝintaj Nacioj (UN) publikigis novan raporton, kiu prezentas teruran bildon: la nombro de rifuĝintoj aŭ delokitoj atingis preskaŭ 80 milionojn. La plimulto de ili estas en sia propra aŭ en evolulando, kie ofte mankas financa helpo.

Laŭ Filippo Grandi, la Alta Komisiito pri Rifuĝintoj de Unuiĝintaj Nacioj (AKRUN) ¹, en 2010 rifuĝis ĉ. 41 milionoj da homoj. En 2019 la nombro estis preskaŭ duoble pli granda (79,5 milionoj). Laŭ la raporto, la kreskadon kaŭzas la fakto, ke tre malmultaj rifuĝintoj revenas al siaj hejmlandoj.

Statistikoj

En la 1990aj jaroj ĉiujare revenis al siaj hejmlandoj averaĝe 1,5 milionoj da homoj, sed en 2019 la kvanto estis nur 390 000. Lige kun tio UN atentigas pri „ŝanĝita realo”. Rifuĝado ne plu estas „mallongdaŭra kaj portempa fenomeno”, diris en intervjuo la Alta Komisiito, kiu aldonis: „Unu elcento de la monda loĝantaro ne povas reveni al la hejmlando pro militoj, persekutado, malobservo de homaj rajtoj kaj aliaj formoj de perforto”.

Laŭ la raporto de UN, homoj rifuĝas ĉefe ekster Eŭropa Unio. La plej multaj rifuĝintoj estas internaj delokitoj – personoj, kiuj rifuĝas ene de sia propra lando – aŭ troviĝas en evolulandoj. Inter la akceptolandoj, laŭ la nombro de rifuĝintoj pinte staras Turkio, antaŭ Kolombio, Pakistano, Ugando kaj Germanio.

Malkreskas ekonomiaj rimedoj

Ne-registaraj organizaĵoj avertas, ke la financa helpo por ilia prizorgado draste malgrandiĝas, kio pligravigas la situacion de la rifuĝintoj. Kontraste al tio la vendosumo de la internacia armil-komercado estas 90-oble pli alta.

El la 9,7 miliardoj da eŭroj bezonataj de UN en 2020 oni promesis nur unu miliardon por homhelpo. Demokratia Respubliko Kongo (DR Kongo) estas la unua en la listo de nesufiĉe financataj krizo-landoj, kie nur ĉ. tri elcentoj de la mono bezonata en 2020 estas certigitaj, sed preskaŭ kvin milionoj da homoj en tiu lando estas internaj delokitoj.

Maltrankviliga kreskado

Laŭ AKRUN, la „zorgovekan” kreskadon kaŭzas parte la situacio en multaj konflikto-regionoj, precipe en DR Kongo, la Sahel-zono, Jemeno kaj Sirio. La interna milito en Sirio, kiu daŭras jam naŭ jarojn, devigis 13,2 milionojn da homoj (unu sesono de la rifuĝintoj tutmonde) forlasi siajn loĝlokojn.

Pli ol du trionoj de la rifuĝintoj eliris el Sirio, Venezuelo, Afganio, Sud-Sudano kaj Mjanmao. La situacio en Venezuelo kulpas parte pri la kresko: fuĝintaj venezuelanoj estas la unuan fojon listigitaj en la raporto, ĉar ilia situacio estas „pli bone dokumentita” laŭ AKRUN. Multaj el la 3,6 milionoj da venezuelaj rifuĝintoj ne estas registritaj kiel tiaj aŭ kiel azilpetantoj, kaj ili okupas apartan lokon en la statistiko. Tamen ankaŭ ili bezonas protekton.

La agnoskitaj rifuĝintoj estas 26 milionoj en la tuta mondo (20,4 milionoj sub la mandato de AKRUN, plus 5,6 milionoj da palestinaj rifuĝintoj). Tutmonde 4,2 milionoj da homoj daŭre atendas respondon al sia azilpeto. AKRUN listigas ilin aparte, ĉar inter ili estas ankaŭ elmigrintoj pro ekonomiaj kialoj, kaj ili ne estas konsiderataj rifuĝintoj. La infanoj en aĝo sub 18 jaroj tutmonde konsistigas 40 elcentojn de la tuta nombro de rifuĝintoj kaj internaj delokitoj (inter 30 kaj 34 milionoj).

Kronvirusa pandemio

„Kulpaj pri tiu mizera stato estas la landoj, kiuj enmiksiĝas en konfliktojn kaj malhelpas pacajn solvojn”, diris Grandi. Tiel oni ne povas krei kondiĉojn por la reveno de rifuĝintoj. Tamen la kronvirusa pandemio kaj la kreskanta malriĉeco ligata al ĝi povus intensigi la fuĝadon al Eŭropo. Grandi asertis: „Mi ne havas dubon pri tio, ke la kreskanta malriĉeco, la manko de solvoj kaj la longdaŭraj konfliktoj kaŭzos pli da popolaj moviĝadoj en la regionoj mem kaj al Eŭropo”.

Solidaremo helpas

„Ankaŭ la pandemio elmontris internacian solidarecon”, diris Grandi. La plej multaj akceptolandoj alligas rifuĝintojn al siaj sansistemoj, kaj aliflanke sukcesis la alvokoj pri donacoj. Ĉi-jare AKRUN jam ricevis – nome de kompanioj kaj unuopuloj – varojn kaj monon en kvanto 15-elcente pli granda ol tio ricevita pasintjare.

1. Retejo de UNHCR: www.unhcr.org. Vikipedio: eo.wikipedia.org/wiki/Alta_Komisiito_de_Unui%C4%9Dintaj_Nacioj_pri_Rifu%C4%9Dintoj